 



发布时间:2014-10-23

ꌄꆣꌠꆃꎭ 

        ꃅꁁꈬꆳ 

  ꍏꇩꁮꐚꃅꄷꆹꊖꆈꃆꄔꁤꏦꄑꊏꀋꇊꌡꑠꁕꐛꊖꆈꋋꁕꄩꈬꌩꈬꇓꃨꈍꀕꈬꉙꈬꃪꐭꌷꀕꊖꆈꋋꁕꇂꃴꅐꇐꊰꃘꑟ 

  ꊿꋅꁰꁱꄚꄉꀑꁏꂪꇱꃅꈍꑋꃪꈎꐛꑌꏁꌬꀕꐩꋊꑭꁘꄚꄉꂴꐩꊁꊜꏿꈍꑋꄙꋊꈳꑌꍝꇖꀕꊿꊇꆹꉌꃀꅔꆹꀕꌠꑌꉪꇐꐓꂿꀕꌠꌌꈭꊛꄉꉀꒆꀋꆏꃅꀻꎆꊖꆈꃆꄔꌡꋋꁕꉓꀍꅩꍅꁏꏁꇅꁤꇅꄑꊿꋅꃆꄔꌡꋋꁯꈝꃀꎵꑳꀕꊫꂫꁤ 

  ꇁꌊꆃꎭꆈꌠꃅꄷꑟꄷꆏꈍꄮꉫꑌꁍꁈꁰꁱꇇꊂꊿꂿꇁꇿꇬꐹꑌꊂꋊꊫꂫꃰꇌꊿꉪꇁꆈꌠꌺꇖꌧꇐꂿꇐꆹꑋꆳꆲꌙꀕꌠꐊꄉꁏꀉꇐꊂꋊꐛꐪꐛꒌꑌꈨꑭꊷꆣꀕꌠꈿꄉꌬꆈꌠꊰꆨꃅꈎꌗꏦꂵꇖꀕꅺꊈꁍꌧꀿꈌꊎꂘꃅꀿꍣꌺꇰꇈ……ꃆꃀꉐꂷꀋꃷꎵꐩꋊꏂꀨꌐꀋꄿꐪꆴꂾꃚꅲꇢꈻꌠꐊꄉꇈꁦꄵꇈꈴꒉꐂꃪꅞꌠꀊꆨꆀꇨꃅꏦꈜ——ꒈꂪꏭꏦꍠꁮꂮꈝꃀꆹꃰꊿꋌꌌꄉꊖꆈꋋꁕꀋꉊꐛꐪꐛꒌꎺꏭꐛꉌꃀꋌꈽꄉꊿꋅꋋꁯꋌꉈꈝꃀꑭꐨꉪꄡꑟ 

                                   

 

  ꁦꌺꈬꂷꈬꄷꋦꆂꒉꈬꂡꈬꈚꈴꄙꇁꉐꈎꉈꏭꀋꎿꀋꈴꀐꌠꐧꋦꐛꏦꋌꃀꋍꃢꆹꆃꎭꌋꆀꋧꃅꋌꁸꋌꑴꂱꑱꅉꐕꄉꑠꃅꑴꇬꊖꆈꐩꋊꎵꑳꀕꋋꁕꈜꀕꋌꌌꌦꇁꌊꌺꐤꅉꀉꒆꅉꁮꅉꀋꏯꆏꉇꉡꇰꃅꅺꊈꌟꃅꆎꍣꉡꇰꃅ 

  ꁧꐛꇉꐙꇐꑌꌋꌩꋦꒉꈴꇑꈪꊰꆃꎭꃅꄷꆹꊿꋅꀉꑌꁯꃅꏓꇁꋧꄉꃄꁕꋍꈚꀀꐛꅹꃅꀹꈨꑴꈜꀕꎔꊿꋅꁰꁱꈜꀕꋽꋍꈓꋍꃢꊒꊰꈚꋍꈜꏓꆃꎭꆈꌠꄔꊒꋩꑍꆹꆫꈩꎆꏣꈯꒆꄿꎟꈆꑪꎾꈴꑠꋌꏓꐯꇯꄉꈍꐯꈋꉐꐋꀨꐡꊈꋩꇩꈐꇩꉈꉂꏣꎺꏣꁉꀘꂾꄯꒉꍈꃀꁏꇁꈤꀋꉆꌠꑊꋒꇬꋑꋏꈩꆏꄮꀋꐥꑿꆺꎾꃝꎿꋮꂾꌙꑮꑟꃅꀹꂵꇖꀕꑣꀠꇁꀒꋤꇁꂷꏦꎫꐛꏦꀋꀵꀕ……ꎔꇁꃨꌠꃅꈋꃄꏦꋽꇁꎔꌠꃅꀹꈨꑴꈭꇁꈳꊿꑓꏣꈍꑋꋌꈻꄉꀋꐚꆫꇁꃧꊿꉌꃀꈍꑋꋌꌭꄉꀋꐚ 

 

  ꌦꌺꒀꊤꄚꄉꃄꄻꊁꄻꋺꑴꄷꀊꑙꐩꍀꄚꄉꈧꇴꆪꄀꋺꑴꄷꃅꈎꃅꆪꃅꑍꃅꉖꆹꐩꋊꑭꐨꅼꇻꀕꑠꈨꋌꋖꋌꁶꊖꆈꋋꁕꄩꄀꄉꉈꑴꒉꊋꅐꀦꊖꃴꅐꇐꒆꇐꐥꇐꑞꑌꀋꃷꎵꃅꋌꈼꋌꀮꐯꇯꄚꎭꇈ 

  ꆃꎭꈜꀋꈼꃅꌗꊷꆣꀕꌗꅐꁦꉘꀕꁍꑗꈬꊂꆿꍯꂷꌵꋭꄮꇬꂷꌵꇣꋦꂔꋭꄮꇬꂔꋍꈭꐨꍏꇩꒈꀑꒈꂪꐯꅑꅉꇬ——ꌩꁧꇓꁧꁬꋲꇓꑠ6000ꎖꑵꄚꄉꐴꅑꅿꊧꅑꃨꂿꑘꌷꇐꌧꃀꀮꇁꏲꅇꑠꃅꉉ:“ꆃꎭꆹꉰꆆꀋꉬꑌꉰꆆꌡꀋꋌꑴꄷꋦꐥꂿꑘꐛꑆꂿꑘꐛꉻꂿꑘꆹꆃꎭꃅꄷꊸꌗꇎꏦꉾꋚꁧꋍꈓꌕꃢꂔꋌꈚꋌꌌꊖꆊꊈꂄꅉ” ﹑“ꌧꍧꒈꂪꏭꋚꂷꅏꅉꋌꐛꋌꐙꅐꇐꊰꃘꑟꋋꆹꌧꍧꃅꄷꄷꀋꁧꍏꇩꁮꐚꁆꏯꀻꎆꊋꂫꑌꐯꑌꈚꐛ 

  

  1965ꍏꉸꏓꂱꇭꉼꇩꄻꐛꀊꉗꀋꐛꑴꌦꄮꇬꏲꇁꂠꌋꇰꀋꃀꑠꂷ(ꄓꑦꀻ)ꇁꌊꆃꎭꃅꄷꁦꇉꒉꃪꃆꂮꉉ:“ꄚꇬꆹꋍꉎꀋꐥꃅꋊꂴꊬꌠ50ꈎꄮꇬꅉꆐꅉꊈꌧꃀꎕꑣꎼꇁꇬꆃꎭꆹꊖꃴꅐꇐꅐꀦꂓꅑꑠꈚꉬꋌꃀꋧꃅꇣꄧꅉꐚꀐꌠꐛꑊꐥꎸꊈ16ꑵꌠꈐꏭꆃꎭꃄꁕꇬꑌ15ꑵꐥꊖꌋꎸꅍꏂꑠꐊꈴꆃꎭꆹꊖꃴꅐꇐꉹꑫꀉꑌꊇꁧꉾꃪꈭꐨꉈꑴꏭꆦꄉꌬꉆꋋꆹꋌꐛꋌꐙꄸꆃꎭꁵꌠꈻꇐꋋꆹꆃꎭꄜꋧꃅꇰꌠꅇꐚ 

                                    

 

    

  ꒉꊋꌫꄻꄉꑾꌋꈤꌌꀻꎆꑾꌋꈤꀖꁉꄉꒉꊋꌌꄆꃑꆃꎭꃄꁕꈐꏭꈍꑋꃪꈎꑍꐩꌊꐩꏿꀐꌠꀉꉷꏂꒉꑷꇊꏦꄇꒉꄹꀧꉘꒉꆹꌩꄹꇓꂵꈍꑋꋌꅸꁧꋺꑌꀋꐚꂤꏂꇓꂵꈍꑋꋌꀵꁧꋺꑌꀋꐚꎆꏣꆿꂷꈍꑋꋍꌌꁧꋺꑌꀋꐚꃅꋊ21ꋏꉘꃀꊬꌠꑟꇁꇬꑲꆀꐩꋊꇬꏁꇅꁤꇅꁏꑠꇅꇫꑟꇁ—— 

  ꇩꏤꒊꃀꀉꒉꋋꌕꂡꇬꄉꄐꎖꋈꄻꇰꀐꌠꒉꊋꄆꃑꅉꀉꒉ14ꂷꈐꏭ9ꂷꆹꆃꎭꃄꁕꈐꏭꐛꌐꑘꀊꂥꎆꏣꀉꒉꋋꆹꋉꑘꅇꈴꅉꃀꉁꈾꌋꆀꂿꑘꅐꇐꑠꉬꇮꋌꄹꋌꆷꌊꀻꎆꈭꐨꉈꑴꉹꁌꎆꏣꈏꃶꐨꑌꋌꈻꎼꆹꀐꊰꈎꐛꈭꐨꆃꎭꃅꄷꒉꄆꃑꅉꌐꀋꉆꄆꊋꋋꈨꉬꇮꏓꇱꎼꇁꇬꌒꑤꄆꍉꌕꂷꌋꆀꐯꒈꒉꊋꄆꃑꅐꀦꂓꅑꋌꈚꆹꏃꃅꆈꏸꀕꌠꋌꌌꁤꇅꀕ 

  

  ꋋꆹꑋꈌꄚꄉꑬꆏꌠꇓꈓꂷꋋꆹꆧꁨꀋꃋꁮꅉꌧꄉꇈꋧꃅꋌꌌꉌꐡꑓꇗꌠꇓꈓꂷꋋꆹꃅꃴꐚꇉꁨꑭꃑꌠꇓꈓꀊꏀꂷ 

  ꆿꁮꀒꎂ——ꆃꎭꆈꌠꊨꏦꏱꅉꍏꏲꄷꈯꄜꋌꈚꆹꃅꈯꏹꈜꈳꐥꀕꇓꈓꄇꈜꁨꇉꀕꃼꇇꃄꅉꄄꍅꀕꆅꉚꆄꄻꌑꐩꀕꂘꇐꉁꈾꐛꒆꈴꊿꀹꃅꀹꐋꀋꌡ……ꀋꇁꆏꀋꌧꆫꇁꃧꊿꇇꏸꆎꄂꉢꀦꃅꇁꋺꀱꀋꏾꈩꇁꀛꊿꅇꎔꆎꌕꉡꇰꃅꒆꇐꒉꊋꆫꈩꊖꃴꅐꇐꊿꋅꁰꁱꋋꉬꑵꆃꎭꋌꌌꈜꀕꎔꈜꀕꇐꑌ2006ꆃꎭꍏꎆꏣꊋꃤꆹꌜꑭꊂ8ꂷꂶꌠꇬꎍꄷꀋꁧꇩꏤꑭꊂꀁꑌꊿꋅꍏꏃ30ꂷꌠꇢꊭꇬꉘꃀꉬꂷꈐꏭꐊꋦꈭꉾꃪꇎꏦꐛꒆꉈꑴꁮꐚꃅꄷꀉꒉꃅꀖꁉꌠꍔꊱꇗꅉꑌꎆꇱꊿꎁꃅꈭꎹꈜꀺꄉꀐ